Thursday, December 17, 2015

කෝ මගේ සාලිය කුමරාණෝ ....


කප්පරක් ... පැතුම් පිරුවේ බුදු සාදු ළග ..
මං ..... නුඹ දුන්නු මල් පුදලා .....
දිගුහසක් .... බලං හිටියෙ දිය පාමුල ....
නුඹ .... එනකන් ..... සසර සැරිතරණට ..

බව ... සිය ගණන් සැරිසරා ... මං ... නුඹ ....
ජාති ජාතිත් මුණ ගැසුනා .... සංසාරේ පුරුද්දට 
මනෝමය පුරාවත .. දිනෙන් දින ලියවුනේ ....
ප්‍රේමනීය ... මතක සටහන් සුවහසක් ලියලමින්....

සුදු ඇතුරු සයනයක ... උඩ බැලිව ... හිස්ම හිස් සුසුමක 
පා කර හැරියේ .... මගේ සිනිදු උවමන් .... නුඹ සනසන්න 
පාවෙන  ... සුසුමින් දින ගණන් බලන් හිටියේ ....  
දෑස් ඉමට නුඹ වත දකින තුරු ..... පෙර පුරුදු විලස ....

කවුරුත් නෑ මං ලග .... රිසි සේ වදනක්  දොඩන්න ....
දිගු සිලින්ජර් .... පාට පාට පෙති .... මගේ සුව විමසන විට 
කෝ ... දැන් ...පෙර සේ ... බවෙන් බවේ .... මා  ළග උන්නු 
සුපෙම්වත් ... මාගේ පෙම්බර .... සාලිය කුමරාණෝ ........ ? 





Thursday, December 10, 2015

මං ..... සහ මගේ ලෝකය ...


උඩට ... යටට .... දෝලනය වේවි .... 
වෙලාවකට හරහටත් ...... පැද්දි පැද්දී මං ......
ඔන්චිල්ලාවක් වගේ .... පාවෙනවා ....
සක බඹරයක් වගේ  කැරකෙනවා ....

කෝච්චියක් වගේ හුම් බාමින් .....
ඇස් ගෙඩි දෙක එලියට පනිනකම් ... දික්කරන් .......
විජ්ජුලතාවක් වගේ පත්තු වෙමින් .....
මහ බබා වගේ පාර දිගේ ... විසි වෙනවා ....

ලෝකයක් හදා ගෙන ලෝකයක් මවා ගෙන .....
සිහින සාරා සංකල්පයක් දකිමින් ....
හිස්ම හිස් ලෝකයක ..... අරුනළු විදිමින් ....
මං  බවේ සැරිසරනවා ..... 




Thursday, December 3, 2015

ඉකි ගසන හැන්දව ....


තෙත බරිත, හරිත නිම්නයේ .....
ගහ කොළ හෙලවෙන වියරු සුළං මැද 
අනෝරා වැහි පොද එකිනෙක ගැටෙමින් 
හඬා වැටෙන මුසල හෝරාවේ .....

ජනෙල් පියන් අතරින් එබී බලන කල 
පෙනී නොපෙනී යන නුඹේ චායාව ....

මලපුඩු පැහැයෙන් ..... ඇතින් ඇතට ....
ශෝක බරිත ම, දෑස් මත උමතුව 
අගි,සන කදුළු බිඳු අස්සෙන්  .....
බොදව යන මළ හිරු කුමරුනේ .... 

ඉකි ගසන හැන්දෑවේ .....
දෙදන මත හිස හොවා ..... හඬා වැටුනේ ....
සමුගෙන නොගිය ....ම,කුමරු ....
ආයෙත් ....නො, ඒ දැයි ....සිතමින්ද ....?







Monday, November 30, 2015

මට කවුරුත් නෑ .....


දන්නවද මට කවුරුත් නෑ කියල .....?
අනේ මං දන්නේ නෑ......

බලන් ඉන්න අය කිව්වේ .....
එයාට හරි පව් කියල ......

සමහරු නම් ...... හිනා වුනා 
හොද වැඩේ කියල .......

මං තාමත් මගෙන් අහනවා ...
මට කවුද ඉන්නේ .......?

බලන් ගියපුවාම ......
හෙවනැල්ල විතරයි .......

ලක්සෙට කොඩි දාපු අය 
පළාතකවත් නෑ .....

ඕක තමයි .......
තිත්ත ඇත්ත ......

Friday, November 27, 2015

කුල ගෙය



මල්දහසක් ගන්වා .....

සුදු පිරුවට මත
නුඹ මා කැන්දා ....ගිය
කුලගෙට  .....

නුඹ මව් .... සිඹ මා උවනත ....
පිළිගත් ..... මනමාලි මං....

සුදු සේද යහනත ... මා සතපා ....
පිරිමැද .... හිස'ග  .... තෙපළු....වදන්....
නුදුරු ... රුදුරු .... වූ අරුම කීම ...

දොර,ගිස්සෙන් .... එබිකම් පාන ...
අවශේෂ දෙනෙත ...... මග හරින
මා දෙනෙත් .....
නිසල සේයාවකි ....

මා වැඩි ... කුලගෙය ... ගිනිගෙය වූ බව ....
නොපවසා බැරිය මට .....
මුනිවත රකින .... නුඹ මව්ට  ....


Thursday, November 26, 2015

සඳ තනියම මම ...... නුඹ ....


තනිකම හුරු මට තනියට 
සඳ නුඹ හා මම දොඩමළු වන විට .....
වැටෙන තුෂර  බිඳු ..... 
හිරි වැටුණු උවනතට 
රහස් කියුවත් ..... සහසක් ....
නුඹ වගේම මාත් තනියෙන් ......
නියෝන් එලි දැල්වෙන 
මන්දාකිනියේ .....


Tuesday, November 24, 2015

වන්දනා ....


ලක්ෂයක් වූ හැරවුම්......
ජිවිත සන්ධානය  ඉස්මත්තේ 
පොපියන වරයන් ....
සමග ..... නොපිරුණු 
එකම පැතුම .....
ඔබ ......?

Tuesday, October 6, 2015

ළමා අපචාර

    


        එන්න , එන්නම රටේ ළමා අපචාර සිදුවන ප්‍රවනතාව වැඩිවෙලා තියෙන්නේ කියල අපි හැමෝම දන්නවා . දවසින් දවස මෙහෙම වෙන්නේ කොහොමද කියල හිතා ගන්න බැරි වෙන්නේ තර්කයකින් තොරවමයි.
 අතීතයේත් මේ විදියට අපචාර වෙලා තියනවද කියල ලොකුවට දැන ගන්න නෑ. ඇත්තටම හේතුව , ඒවා ගැන ,  දැන ගෙනත් කව්රුවත් නොකිමද ...? නැත්නම් .... ලොකු හානියක් නොවීමද ...? එහෙමත් නැත්නම් මාද්‍යයේ නොදියුණු කමද ...? 


මට මතකයි අපි ඉස්කෝලේ යන කාලේ , අපි ළමයි කියල හදුන්වන යුගේදී, අපේ වයසේ සමහර ළමයි, ආදරේ කරලා , පැනල ගියා , කොල්ලන් එක්ක. එතකොට අඩු වයස වෙද්දීත් , අපි දෑනන් හිටියේ නෑ, මේකත් ළමා අපචාරේම තමයි කියල . සමහර ළමයි හිටි ගමන් ගෙදර නතර උනා. ආරංචි උනේ, කගේ හරි අතින් කරදර වෙලා මුණ දෙන්න බැරිව නතර වෙලා කියල .  පස්සේ බලන කොට අඩු වයසින්ම කාට හරි බන්දල  දීලා. සමහර ළමයි ටිකක් විසේට හිටිය .... පිරිමි ළමුන් එක්ක ඇවිදලා ඔවුන් අතින් දුෂණය වෙලා . එහෙමත් නැත්නම් , කුඩා කල අතවර සිදුව,  විවාහ කල්පමාව හෝ සදාචාර විරෝධී චර්යාවන් ගත කරන ගැහැණු බවට අද වන විට පත් වෙලා .  එදා ළමුන්ව සිටි ඔවුන් අදටත් ඉදහිට හමුවෙනවා. ප්‍රගතිය මැන ගත්තේ එතනින්, සමහර විවාහ ජිවිත .... අතීත අතවර හේතුවෙන් අවුල් වෙලා .  දැන් තමයි මේ සිදුවෙන ළමා අපචාරත් එක්ක , ඒ කතා මතක් වෙන්නේ , එහෙත් බාල වයස් පිරිමි ලමුන් ගැන නම් කුමන කතාවක් වත්  ඔය විදියට ආරංචි වෙලා නෑ. 



එතකොට ලැබිච්ච දඩුවම් ... ඒ චුදිතයන්ට ... කිසිවක් නෑ.  බල පුළුවන්කාරකම් තියන පවුල් වල ඔවැනි සිදුවීමක් උනොත්, ශේප් එකේ සල්ලි දීල අයින්  කරනවා, පැනල ගියොත් බොහෝ විට වැඩි වයස දාලා හරි කසාද බැදලා. නැතිනම් අහිංසක පාර්ශවය බොහෝ විට අලාභය දරා ගෙනම නිහඩව විදවනවා. නැතිනම් අද වනවිට තවත් අපචාර වලට උදව් දෙනවා.  

මේ සිද්දිය අතීතයේ සිටම දිගින් දිගටම සිදු උනා කියල මට නම් හිතෙනවා. එතකොට ළමා අපචාර කියන්නේ නිලීනව බල පවත්නා සමාජ ක්‍රියාවක්ද කියල වරෙක හිතෙනවා, ඔබ .....  මේ වන විට වැඩි වයසක් පහුකර ඇත්නම් , මේ සංසිද්ධිය මතක් කර බලන්න . ඔබට අහන්න ලැබුනේ එදා මොනවාද කියල . 


ළමා අපචාර සදහා ඇති නවතම ප්‍රවනතාව නම් අතවරයෙන් පසු  මරා දැමීමයි. එයට හේතුව , අතීතයේ නීති ක්‍රියාත්මක නොවුවත්, අද වන විට නීති බලපවත්නා නිසා, දුෂකයෙක් යන සමාජ නාමයට ඇති බිය නිසා,  ප්‍රබල මාද්‍ය ඔස්සේ සිය දහස් වරක් , ඔහුවද දුෂණය වන නිසාවෙන් ළමුන් මරා දැමීම සිදුව තිබෙනවා. 

ළමා කාමය සදහා මේතරම් පිරිමි උනන්දු ඇයි....? මේ තත්වය මානසික ව්‍යකුලත්වයක ප්‍රතිපලයක්ද ....? එසේත් නැත්නම් .....හෝමෝන සාන්ද්‍රණයේ හදිසි අඩු වැඩි වීමක්ද ...? මෙය කොන්ඩයගේ සහෝදරයා ගැන නොව ( ඔහු සුළු මානසික රෝගියකු බැව්  ප්‍රදේශයේ ප්‍රකටව ඇත |) මට මතක් උනේ අර මාතර පැත්තේ හිටපු ප්‍රාදේශීය සභා මන්ත්‍රී , ඒ වගේම තංගල්ලේ ව්‍යාපාරිකයන්ගෙන්  සිදු වූ පාසල් ළමයකු සමුහ දුෂණය යන සිද්දීන්. ඔවුන් නම් සාමාන්‍ය මානසික මට්ටමේ උදවිය. 


එදා සිට අද වන තෙක් ළමුන් දුෂණය වැඩි වෙලා මිස අඩු වෙලා නම් නෑ. මේ දුෂක උත්තේජනය මිනිසුන්ට ලැබෙන්නේ කොහොමද ....? ඔබ දන්නවද ...? සොයාගත යුතු කරුණ එයයි, මට හිතෙන විදියට එතනින් තමයි මේ සමාජ පිළිලය ඉවත් කරන්න උත්සහ ගන්න ඕන.ගෙවල් වල ඉන්න දරුවන් අමු අමුවේ දුෂණය වෙද්දී, අර විදි දරුවන්ට සිදුවන අතවර ගැන කවුරුත් නොදන්නේද .....? අප ඔවුන්ට සිදුවන දේ ගැනත් අවදානයෙන් සිටින්න ඕනේ. මොකද බාල අපරාධකරුවන් බිහි  වෙන්නෙත් එතනින්. රැදවුම් නිවාස ගතව සිටින , බොහෝ ළමුන්ගේ කතා මං අසා තිබෙනවා. එලෙස විනාශ වුනේ අපේ රටේ අනාගතය කියල කවුරුත් හිතන්නේ නෑ. 

සේයා ඝාතනයත් සමග ගම් මට්ටමින් දැනුවත් කිරීම් වැඩසටහන් ක්‍රියාත්මක උනා. ළමුන් ආරක්ෂා කර ගන්නේ කොහොමද ....? ගෘහනියගේ කාර්ය භාරය කුමක්ද ....? මේවා තමා මාතෘකා උනේ . දැනුවත් වෙලා දවස් දෙකයි ගියේ , මගේ දුරකථනයට සිද්දීන් දෙකක් වාර්තා උනා. 

පළමු වැන්න ආච්චි අම්මා කෙනෙක්ගෙන් තම හය හැවිරිදි , මිනිබිරිය (මව මන්ද මානසික තැනැත්තියක් ) නාවද්දී , රහසග ඉදිමි ඇති නිසා දැරියගෙන් ප්‍රශ්න කර ඇත . පිළිතුර වුයේ ,  ඇයගේ පියා  හවසට බිමත්ව පැමිණ ඒ ප්‍රදේශය පිරිමදින බවයි. 


දෙවැන්න ... ඒ ගමේම , අම්මා, තත්තා, රස්සාවට යන නිවසක ගැහැණු දරුවකු තනිව නිවසේ සිටින විට , අල්ලපු ගෙදර ගෘහමුලිකයා විසින් ඔහුගේ ගෙදරට ඇය ගෙන්න ගෙන අසභ්‍ය වීඩියෝ දර්ශන පෙන්වීමයි. සේයාගේ කතාව අහපු මේ දැරිය , දෙමාපියන්ට මේ බව පවසා ඇත. පසු දිනයේ දැරියගේ පියා  පාරේ රැක සිට පොරෝ පාරවල් ගැසීමෙන්, චුදිතයා නොමැරී ... රෝහල් ගතවීමත්, පියා බන්ධනාගාරගත වීමත් සිදුවන ලදී. 

ඉතින්..... ඔබට පෙනෙනවද .... ළමා දුෂණය කියන්නේ අපරාධ වැලක ආරම්භයක් බව. මේ ආකාරයට  ආරවුල් ඇතිවූ පවුල් කියක් අප අතීතයේ සිට දැක ඇත්ද ...? මේ හේතු මත සාමාන්‍ය මිනිස්සුත් නිතිය අතට ගන්නා යුගයක් නේද තිබුනේ. අදත් මේවා සිදු වනවා ඇති. 

ඉහල පවුල් වල දෙමාපියන්ගේ නොසැලකිල්ලෙන් තම දියණිවරු , මෙහෙකරුවන්ගෙන් පවා දුෂණය වෙලා තියනවා. ඒ වගේම , සහෝදරයන් අතින් දුෂණය වෙලා තියනවා, එම ළමුන්ගේ නීති විරෝධී ගබ්සාත් ඒ වගේමයි. පවුල් වල නම්බුව රකින්න මේ ගබ්සා සිදු කර තිබෙනවා. 


ඉතින් මේ බාල අපචාර කියන සංසිද්දිය අපි ලේසියෙන් බැහැර කලයුතු..... අමතක කලයුතු කාරණාවක් නොව , දිගින් දිගටම සිදු වන්නක් .  අද සේයා වගේම. හෙට කවුරුන් ගොදුරු විය හැකිද ...? මේ ගැන හිතන්න. මාද්‍ය ප්‍රචාර වලට සවන් දුන්න වගේම , ළමා දුෂණය ඔබට තවත් එක් ප්‍රවෘත්තියක් පමණක්  නොව, තමාගේම ඛේදවාචකයක් බව සිතන්න. 




  









Sunday, October 4, 2015

විශෝධනය හා දඩුවම

  


          මරණ  දඩුවම නැවත ක්‍රියාත්මක කරන්න යයි..... සමාජ මතයක් මේ දිනවල පවතී..... වරදක් සිදු වීමට ,  හේතුව හෙළි කරන්න යයි කිසිවකුත් නොඉල්ලති වරදට හේතුව මේ සමාජයමද  ...? වරදකරුවන් බිහි කරන්නේ කවුරුන්ද ...? 

අපරාධකරුවන් බිහිවීම සම්බන්ධයෙන් , මේ වන විට ජෛව විද්‍යාත්මක සාධක හා උපන් අපරාධකරු යන න්‍යායන් බිද වැටි ඇත ..... 
එසේ නම් පරිසර සාධක අපරාධකරුවකු බිහිවීම කෙරේ බලපා ඇති බව පිළිගන්න වනවා නේද ....? 

වරද ---- දඩුවම 


මේක උත්තරයක් කියල අපි හිතන්නේ කොහොමද ....? මොකද අපරාධකරු දඩුවම් විද නැවත පැමිණෙන්නේ මේ සිවිල් සමාජයටමයි . එසේ නම් ඔහු එල්ලිය යුතුද .....?  නැතහොත්, ඔහු පොරක් නම් , මල් මාලා දා සාදරයෙන් පිළිගත යුතුද ....?

නැත ...... වරදකරු සමාජ ගත වීමේදී ...... ඔහුව පිළිගත යුතු මැද මාවතක අවශ්‍යතාවයක් ඇති බව දැන් නම් අප පිළිගත යුතුය. 

මරණ දඩුවම ක්‍රියාත්මක වන රට වල  වැරදි අඩු වී ඇතයි සිතීම ..... වැරදීමකි. එවන් රටක් ඇති බව මා අසා නැත.  යම් රටක මරණ දඩුවම ක්‍රියාත්මක වීම,  මා දකින්නේ , එරටේ ... සමාජ සංස්කෘතියේ පිළිබිඹුවක් බවයි. 

අතීතයේ පටන් අප රටේ මරණ දඩුවම ක්‍රියාත්මක විය. පෞද්ගලික පලිගැනීම් වලට පවා , සාක්ෂි නොමැතිව මරණ දඩුවම ක්‍රියාත්මක විය. එතෙක් .... මෙතෙක් අප ලැබුවා වූ ප්‍රගතියක් ඇත්ද ....? 

එකල, [ අප දන්නා තරමින්, ඇහැලේපොල, දස්කොන් ආදී මරණයන්] අහිංසකයින් පවා මරණ දණ්ඩනයට ලක් විය. දැනුත් ඒ දේම නොවෙන්නේ යයි සිතිය නොහැකිද ....? වර්තමාන නිතිය  මගින් සියල්ලම වැරදි ආවරණය නොවන කල සාධාරණ විනිශ්චයන් සැම විටම දක්නට නොලැබේ. විනිසුරුවන් පවා ඒ සිද්ධාන්තය පිළිගෙන ඇත. නිවැරදිකරු වැරදිකරුවී..... වැරදිකරු නිවැරදිකරු වී, ....... විසදුනු නඩු තීන්දු කොතෙකුත් අප දැක ඇත. 

එසේ නම් දඩුවම් ක්‍රමය සාධාරණව ක්‍රියාත්මක වේදැයි, අපට කිව නොහැක. එබැවින් වරදට පිළිතුර දඩුවම නොව ..... වෙනත් විකල්ප ක්‍රියා මාර්ගයක අවශ්‍යතාවය මේ වන විට පැන නගමින් පවතී. 

ඇමරිකන් හා ඕස්ට්‍රේලියානු වැනි දියුණු රාජ්‍ය වල දඩුවම් ක්‍රමය වෙනුවට විශෝධනය සුදුසු යයි. විකල්ප ක්‍රමවේදයන් අත්හදා බලමින් පවතී. ඔබ මේ බව දන්නවාද.......?

community corrections ..... වරදකරු  විශෝධනය කිරීම සදහා මනෝවිද්‍යාත්මක ක්‍රමවේදයන් සැකසීම මේ ක්‍රමයේ ලක්ෂණය වේ. සමාජීය පිළිකුල්භාවය වෙනුවට , අනුකම්පාසහගත මේ වැඩ  පිළිවෙල ක්‍රමානුකුලව සිදු කිරීමෙන් වරදකරු වැරදි චර්යාවෙන් මුදවා ගැනීමට පිටිවහලක් වේ. 

මේ සදහා දැඩි ඉවසීමකින් හා සංයමයකින් යුක්ත ..... පුහුණු හා සුදුසුකම් ලත් නිලධාරීන් අවශ්‍ය වේ. 

වරදකරුවන් සැකකරුවන් විදියට හෝ වරදකරුවන් විදියට , බන්ධනාගාර ගත වීමේදී, රජය බන්ධනාගාර නිලධාරීන්ගෙන් , බලාපොරොත්තු වන  කාරනා  කීපයක් ඇත. 

බන්ධනාගාර දෙපාර්තමේන්තුව සදහා නිලධාරී බදවා ගැනීමේදී  මුඛ්‍ය පාඨය වුයේ වරදකරුවන් සදහා  ආරක්ෂාව ,රැකවරණය හා පුනුරුත්ථාපනය ලබා දිය යුතු බවයි.  මෙයින් මුල් කාරණා  දෙක යම් වශයෙන් ඉටු වුවත්,  විශෝධනය නම් නිසි ලෙස ඉටු නොවේ. 

හේතුව මා දකින  විදියට අදාල තනතුරු වලට බදවා ගැනීමේ ක්‍රම වේදය තුල නිසි පුහුණු නිලධාරීන් බදවා ගැනීම සදහා , බදවා ගැනීමේ පටිපාටිය සකස් නොකිරීමයි. උපාධිධාරීන් බදවා ගැනීම අවම මට්ටමකත්, මෙතෙක්, බදවා ගැනීමේ විභාග පැවැත් වුවද , දේශපාලන හිතවතුන් වැඩිමනක් බදවා ගැනීමක් වැඩි වශයෙන් සිදු විය. අදාල අමාත්‍යවරයා නියෝජනය වන ප්‍රදේශයෙන් පත්වීම් ලත් ආකාරය අනුව බදවා ගැනිම් තර්කයකින් තොරවම , පිළිගත හැක. 

මෙය ..... වඩාත් හොදින් පෙනෙන්නේ , මේ දිනවල බන්ධනාගාර ආරංචි මාර්ග පිරික්සීමේදී, නිලධාරීන් සතු  වූ සුදුසුකම් හා දක්ෂකම් එලියට ආරංචි වීමෙනි .  මේ හේතුවෙන් , විශෝධනය වෙනුවට වැරදි ආදර්ශ පමණක් රැදවියන්ට ලැබෙන කාල පරිච්චේදයක් පැමිණ ඇත. 

විශෝධනය යනු කුමක්ද ....? වරදකරු නිසි කායික හා මානසික සෞඛ්‍යකින් පිරිපුන්ව තැබීමයි. මෙය කෙසේ සිදු කරන්නේද ....? ඒ සදහා ගැලපෙන ක්‍රියාවලියක් සැකසීමයි. කවුරුන්ද මෙය සිදු කරන්නේ ....? ඒ සදහා සුදුසුකම් ලත් නිලධාරීන්. වගකීම.....? සියළුම පුරවැසියන්ගේ වගකීමයි  ...... 

වරදකරු බන්ධනාගාරය තුලදී හෝ, සමාජයේදී විශෝධනය වීමේදී නිසි අධීක්ෂණයකින් යුතු වැඩපිළිවෙලක් තිබිය යුතුය. වරදකරු වැරදිත් සමග සමාජ ගත වීමේදී , සිදු වන්නේ නැවතත් ඒ ආකාරයේම වැරදි සිදු කිරීමයි. එසේ නම් එම ක්‍රමවේදය සැකසීම වහා ඉක්මනින් ක්‍රියාත්මක වනවා දැකීම, අප සියළු පුරවැසියන්ගේ බලාපොරොත්තුවයි. 

නැවතත් සාක්ෂි නැති මරණ හා අපරාධ තව දුරටත් සිදු නොවේ යයි අප බලාපොරොත්තු වෙමු. මන්ද මානසිකත්වයෙන් යුක්ත වුවන් හට කරක් ගැසීමට සමාජය ඉඩ නොදිය යුතුය...... 

මානසික ඒකග්‍රතාවයක් නොමැති ජනතාව වසන රටක ජීවත්වීම, පාපයක් ලෙස සිතීම සාධාරණය නොකරන්නට , සියලුමදෙනා වග බලා ගත යුතිය. 



ගමක ජිවත් වන පුද්ගලයන්ගේ තරාතිරම ..... ගම වැසියන් යම් තරමක් දනී. ගමේ ග්‍රාම නිලධාරියා, සමෘද්ධි නිලධාරියා, ආර්ථික සංවර්ධන නිලධාරියා ඇතුළු ප්‍රාදේශීය ලේඛම් කාර්යාලයේ පත් කරන ලද තවත් විෂයානුකුල නිලධාරීන් රැසක් ඇත. මොවුන් සිටින්නේ ඇයි.....? ගමේ ප්‍රශ්න  යම් තරමකට විසදීමට මැදිහත් වීමටයි. මේතාක් නිලධාරීන් සිටිද්දී, කෙසේද සමාජ අපචාරයන් සිද්ධ වෙන්නේ ...? 

වලක්වන්න පුළුවන් , යම් මැදිහත් වීමක් වෙන්න , මේ අයට නිත්‍යානුකුල අවසරයක් ඇත. එසේ නම් .... පොලිසියට යාමට පෙර , ගම් වැසියන් දන්නා තොරතුරු මෙම නිලධාරීන් වෙත වාර්තා කිරීමට හැකියාව ඇත. සුළු වැරදි හා විෂම චර්යා පාලනය කිරීමේ හැකියාව මෙමගින් ලැබෙන බව ඔබ දන්නවද ....? දැන්වත් දායක වන්න ගමේ ඇති මේ කර්තව්‍යට . ගම් මට්ටමින් විෂම චර්යා ඇත්තවුන් විශෝධනය කිරීමේ හැකියාව ඔබට ඇත්තේ මෙලෙසිනි. 

වැරැද්දට එරෙහි වීමේ අයිතිය ඔබට ඇත. එහෙත්, එම වැරැද්දට දඩුවම් පැමිණවීමේ අයිතිය ඔබට නැත. ඔබ නීති ගරුක පුද්ගලයෙකි. නිවැරදි පුරවැසියන් බිහිවනු දැකීම හා යහපත් රාජ්‍යක් බිහිවීම සියළු දෙනාගේම බලාපොරොත්තුවයි. 

ලෝකයේ දියුණු රට වල අපරාධ අවම කිරීම සදහා වරදකරුවන් සම්බන්ධයෙන් තෝරාගෙන ඇති ක්‍රමවේදය ප්‍රජා විශෝධනයයි. ලංකාවට සාපේක්ෂව ඒවා ක්‍රියාත්මක වන ආකාරය ඔබට දන ගැනීම පිණිස , එම මද්‍යස්ථාන කීපයක චායාරුප පහතින් දක්වමි .  එම රටවල් විසින් විශෝධන මද්‍යස්ථාන පිහිටුවමින්, උපදේශනය සිදු කරමින් , අපරාධ අඩු කර ගැනීම සදහා සදාචාරාත්මක ක්‍රමවේදයකට යොමුව ඇති ආකාරය අප බලමු  . 














Friday, September 11, 2015

බොරුව


      මිනිස්සු බොරු කියන්නේ ඇයි කියල හිතුවොත් , ඔබට මොකද හිතෙන්නේ ? ඔබ එක දවසකවත්, එක බොරුවක්වත් කාටවත්ම කියල නැත්ද ....? 
එහෙම නැත්නම් ඔබ සැම විටම ඇත්ත කතා කරන පුද්ගලයෙක්ද ? 
      පුංචි කාලේ අම්මා අපිව නලවන්න කොච්චර නම් බොරු කියන්න ඇත්ද කියල මට මතක් උනා. අම්මා එහෙම කරේ කුමන චේතනාවෙන්ද කියල අපි දන්නවා . අම්මා බොරු කිව්වේ අහිංසක චේතනාවෙන් හා අප කෙරේ දැඩි ආදරයකින් .
       ඒත් .... මේ බොරුව අපේ ජාන වලට මුලින්ම එකතු වෙන්න ඇත්තේ එතනින් කියලයි මට හිතෙන්නේ .
ජිවත් වෙන නම් බොරුව අවශ්‍යද ...? ඇත්ත ඉස්සරහට  දාගෙන වැඩ කරන්න බැරි උන හැම වෙලාවකදීම බොරුව ඇදිල එන හැටි මං දැකල තියනවා. 
        බොරු කීමෙන් පවක් සිද්ධ වෙනවා කියල අපේ ආගම දහමේ කියල තියනවා . ඒ වගේම , බොරුව නිසා තව කෙනෙකුට හානි වෙන අවස්ථා වගේම එම බොරුවම හේතු කාරණා කොටගෙන තමන්ටම හානි වෙන අවස්ථාත් මං දැකල තියනවා . 
       බොරුව කියන්නේ අපේ පැවැත්මද කියලත් වරෙක හිතෙනවා , මොකද අපි ඇදුම් අදාල ඉන්නෙත් , ඇත්ත හංගගෙන නේ . ඇත්තට වඩා බොරුව ජනප්‍රියයි . 
මට ඇත්ත දකින්න ඕන කියල හිතුවට කෝ ඇත්ත ...? ඇත්ත කොහෙද තියෙන්නේ ...? 
ආදරය කරද්දී දහසක් බොරු පොරොන්දු ලැබෙනවා . ඒවා කොයි තරම් සුන්දරද ...? බොරුව අපිව ආත්ම  ගානක කතාවක කාල පරිච්චේදයක් ඉතාම සුන්දරව ලියල දෙනවා. 
       බලය පතා අපේ වැඩ කාරයෝ කොච්චර නම් බොරු කියල ඇත්ද ...? ඒවා හරිම රැඩිකල් සහ හිත දිනන කතා . ලෝකය ඉස්සරහට යන්නේ මේ ගල් පැලෙන ලෝක බොරු වලින්. 
        බොරුව නිසා ලැබුණු දෙයක් සහ ලබා ගත්  දෙයක් අපට තිබුනද ...? මේ සියල්ල තාවකාලිකයි කියල , බුදු බනේ  කියල තියනවා . ඇත්ත තිත්තයි කියලා දවසක් අම්මා කිව්වා . ඒ කියන්නේ බොරුව කොයි තරම් පැණි රසද ...?  
        මට මේ ඇත්ත බොරුව තේරෙන්නේ නැ . දන්නා කෙනෙක් ඉන්නවා නම් කියල දෙන්න . ඇත්ත බොරුව හදුනා ගන්න අමාරු තරමටම සංකීර්ණ වෙලා. 
ඒත් ..... මට ඇත්ත දකින්න ඕන .....
      බොරුවට වැඩි ආයුෂ නෑ කියලත් සමහරු කියනවා . ඒ කියන්නේ  ඇත්ත කියන අයට  දීර්ඝ ආයුෂ තියනවා කියන එකද ...? 
       ඇත්ත බොරුව හදුනා ගන්න බැරි මං මුලාවක හිරවෙච්ච මට වගේම ඔබටත් මේ දේවල් මේ විදියටම  දැනිල ඇති .



Thursday, September 10, 2015

හිමොග්ලොබින් අඩු වන්නේ ඇයි ....?


        රුධිරයේ හිමොග්ලොබින් අඩු කම, නැමති අසනීප තත්වය සහිත රෝගීන් විශාල වශයෙන් වැඩිව ඇති  බව  හා  මිට අමතරව හිමොග්ලොබින් වැඩි වීම නැමති රෝගයද සුළු වශයෙන් වාර්තා වන බව මා වෙත දැන ගන්නට ලැබුණි. මේ බැව්  රෝහල් ආරංචි මාර්ගද  සදහන් කරයි . 
       වයස් බේදයකින් තොරව , මේ තත්වයට මුහුණ දෙන ශ්‍රීලාංකිකයන් , අඩු ආයුෂ ලබන බව මේ වාර්තා වලට  අනුව හදුනා ගත හැක . තැලිසීමියා නැමති රෝගය හා ඒ හා සම්බන්ධ රෝග ගණනාවක් ඇති බව සදහන් වේ. මේ රෝග සදහා සායන , ප්‍රධාන රෝහල් ගණනාවකම පිහිටුවා ඇති අතර ඒ සදහා ප්‍රතිකාර කරද සාර්ථක භාවයක් දක්නට නැත .
රුධිරයේ හිමොග්ලොබින් අඩු වන්නේ ඇයි ? මේකට හේතුව මොකද්ද ? 

මේ මා  දන්නා තරමිනි.

01 . නිසි පෝෂණයක් නැතිකම 
02 . ආරය
03 . මානසික ආතතිය 
04 . අධික රුධිර වහනය  
05 . වකුගඩු සම්බන්ධ රෝග 
06 . පෙනහළු ආශ්‍රිත රෝග 
07 . ඩෙංගු වැනි මාරාන්තික උන රෝග සැදීමෙන් 
08 . ගර්භනී අවස්ථා වලදී 

මිට අමතරව , වෙනත් කාරණා තිබේද ...? 

හිමොග්ලොබින් අඩුවීම සම්බන්ධයෙන් ම දන්නා ප්‍රතිකාර 

01 . රුධිර පාරවිලයනය 
02 . නිසි පෝෂණය ලබා දීම 
03 . Erythropoiesis    එන්නත් කිරීම .
04 . උපදේශනය 

මෙයට අමතරව වෙනත් ප්‍රතිකර්ම ඇත්ද ...? 

     හිමොග්ලොබින් අඩුකම නිසාදෝ පසුගිය වකවානුවේ , පාසල් නිවාසාන්තර තරග වලදී හා වෙනත් ශාරීරික අභ්‍යාස වලදී ළමුන් හා වැඩිහිටි පුද්ගලයින් කිහිපදෙනෙකු මිය යන ලදී . 

 මේ තත්වයට හේතු ලෙස බලපාන්නේ 
    ලංකාවේ අහාර රටාවේ වෙනස් විමක්ද ...?  නැතහොත් අහිතකර කිරණ විශේෂයක් පරිසරය තුල ක්‍රියාත්මක වීමෙන්ද  ....?

     රුධිරයේ හිමොග්ලොබින් ප්‍රමාණය වැඩි කිරීමට හා එම තත්වය රදවා සිටීමට අප කුමක් කල යුතුද ...? සැම විටම රුධිර පාරවිලයනය යෝග්‍ය නොවේ . ආසාධිත තත්වයන් පවා ඇති විය හැක.

     වයස්ගත වුවන්ගේ රුධිරයේ හිමොග්ලොබින් අඩුවීම කුමන හේතුවක් මත සිදුවේද ...? මෙයද ලාංකීය සෞඛ්‍ය ක්ෂේත්‍රයේ වර්ධනීය අවස්ථාවක් ලෙස හදුනා ගෙන ඇත . 

     Born marrow testing වලින් පසු , මෙම රෝගයෙන් පෙළෙන ,  බහුතරයකගේ අවසානය ලෙස ලියුකේමියා ලෙස හැදින්වීම නිවැරදිද (රුධිර පිලිකා ) 

     මා  වෛද්‍යවරයකු නොවේ, මේ තත්වය අත්දකිමින් සිටින තැනැත්තෙකු ලෙස,  දන්නා අයගෙන් සාමාන්‍ය කරුණු විමසීමක් හා අනෙක් අයට දැන ගැන්වීම පිණිස මෙලෙස සටහන් කරන්නට සිත් උනි. 

Friday, August 21, 2015

සිහින මන්දිරය


මලින් මල එකතු කරන් ........  
මල් අහුරක් දෝතට ගෙන ....
පැතුවේ පුංචි පැතුමක් විතරයි මං ............
ගලින් ගල එකතු කරන් හැදුවේ ... 
මං මගේ  සිහින මන්දිරේ 
ඔයත් එක්ක කුඩු වෙන්න නෙමේ.......
මට හිතට නිවනක් ඕන නිසා......
හතර වටින් .... වට කරන් .... 
කන්දක් වගේ උසට 
සිමා මායිම් තැනුවේ .....
මං මගේ පාඩුවේම ඉන්නයි......
පොකුරු පොකුරු ...... මල් පිපෙන්න .......
සමනල් හීනයක් ........ මගේ නෙතු අග රඳව ගන්න 
මගේ සිහින මන්දිරේ...... මං විතරයි තනියම ......
එන්න එපා කවුරුත් ..... 

Sunday, July 26, 2015

උක්කුං පුතේ......


උඹ වැල්ලේ වැටි වැටි.... දුවන කොට ..... 
මං උම ගැන කෝම හින දැක්කද ......
උම ගෙදර වීරයා...... දඟයා ...... හුරතලා......
මං උඹට ...... මොනවට ආදරය කලාද ...... මයෙ  පුතේ....

ඔය ඔක්කොටම කලින් මං උඹේ ලෝකය දැක්කා.....
උඹ ....නාහෙට අහන්නෙ නැති වෙනකොට .....
මං උඹට කිව්වා .... ඔය ටික වෙන බව......

උඹ  මං දාල යන බව ...... එක හීනෙක නෙමෙයි.....
දස දහස් වර මං දැක්කා......
අම්ම කෙනෙකුට මේවා දකින්න බෑ...... ඒත් ..... මං දැක්ක ....

මේවා උඹට මං කියල දීපුවා නෙමෙයි......
උඹම ඉගෙන ගත්තුවා .......

වෛරයෙන් වෛරයෙන් ...... නිවෙන්නේ නෑ......
අධර්මයෙන් ධර්මය දිනන්න බෑ......
මේවා මං උඹට කිව්වා .......

උඹ වීරයා උනේ මට නෙමෙයි පුතේ......
උඹේ ..... නරුම ලෝකයට ...... විතරයි...... උඹ වීරයා......

උඹ අර ..... මහ උළු ගෙදර ඉන්දෙද්දී විතරයි ..... 
මං ටිකක් සැනසීමෙන් හිටියේ .....

මං දන්නවා පුතේ..... මට වඩා උඹත් දන්නවා ....
උඹට .... මේ ලෝකේ  පය ගහල ජිවත් වෙන්න බැරි බව .....
මං උඹ හොදයි කියල කියන්නේ කොහොමද .....? 

අන්තිමට උඹව අරන් ගියෙත් උන්මයි.....
වෙඩි වරුසාවකින් උඹට ආශීර්වාද කලෙත් උන්මයි....

උඹ හරියි ..... කියල මං කියන්නේ නෑ පුතේ......
උඹ වීරයෙක් වෙන්න ඕන නෑ මට.....
දන්නවද ....? පුතේ ...... උඹ වැදු මට ...... 
මිනිස්සු ශාප කල බව .... උඹ ඒවා දන්නවා.....
ලෝකෙම මට බනිනවා .....

මේවට උත්තර දීපන් පුතේ .......
ඇයි...... උඹ මේ මුරුග රැලක් මැද අතරමං වුනේ ......?

ඇස් පියන් ඉන්න එපා පුතේ ...... නැගිටලා ඇවිත් 
මේවට උත්තර දීපන් මයෙ  පුතේ ......

උඹ මැරුණා කිව්වම  මං පුදුම උනේ  නෑ.......
ඒත් ...උඹ බලන්න ආව සෙනග කන්දරාව ......
මං උඹට බැන්නට...... උන් උඹට බනින්නේ නෑ....
උන්ට උඹ නැති පාඩුව දැනිලා.....

උඹේ හයියෙන් ජිවත් උනේ අපි නෙමේ ......
පිට උන් ...... නේද මයෙ පුතේ .....
උන් විතරයි....... උඹට තනි රකින්නේ ගෞරව කරන්නේ ......

උක්කුං පුතේ උඹ මට අර ඉස්සෙල්ල හිටපු ...... 
චුටි කොළුවා .... විතරයි පුතේ ...... 
උඹ මගේ ලෝකේ  හැමදාම විරයාමයි පුතේ .......









Thursday, July 23, 2015

රෝස මල


රෝස මලක් පෙන්වා .... ලබා ගත් ආදරය 
පිණි ඇතුරූ .... පලසක සැතපු ..... සුපසන් ප්‍රේමය .....
මන්දාකිණියක් වගේ  ...... විචිත්‍ර නුඹේ මුවනතට  .....
අනේ ..... මං ආදරය කරපු තරම් .... 

පිහි තුඩඟ ...... පැටළුණු ... නුඹේ වදන් ....
ඇනෙන විට මගේ හදවත් කුහරයේ .....
නහරයක් ...... නහරයක් පාසා ...... 
ලේ බිඳු ..... කැළති  .... කැළති ......
කදුලක්ව ...... රුටනා විට .....

අනේ එදා මට ..... නුඹ දුන්න රෝස මල 
බය භිරාන්තව ..... කනප්පුව උඩ 
එහෙට මෙහෙට වැනෙන  කොට .....
ඉවසුම් දෙන්නෙ නෑ..... මට ....
දුක දෝරේ ගලන විට ......



Thursday, July 16, 2015

දේශ - පාලන දෙවියනි......


රට පාලනය කරන දෙවියන් වහන්සේගෙන් මං අහන්න කැමතියි..... දේශයක් පාලනය කරන එකටද ...... දේශපාලනය කියන්නේ කියල.... දේශයක් පාලනය කරන්නේ ඇයි.....? අපිට ඔහේ ජිවත් වෙන්න පුළුවන්නේ. 
මං හිතන්නේ අපිව ඒකීය රටාවක් තුල ගොනු කරන්නයි, දේශයක් පාලනය කරන නායකයෙක් බිහි වෙන්නේ ...? අපි ඒ විදියට ඒකීය රටාවක් තුල හැඩ ගැහීම ඇත්තටම සාර්ථකද ...? 
ඒකීය රටාවක් තුල ගොනු වෙන්න නම් ...... අපේ නායකයා කවුරුන් වෙන්න ඕනද ...? කුමන  විදියේ .... බලයක් ඔහුට තියෙන්නේ ඕනද ...?
බලය කියන්නේ මොකද්ද ...? දේශයක් පාලනය කරන නායකයට බලයක් අවශ්‍ය ඇයි ....? ඔය විදියට එකම දේශයක් තුල නායකයන් කිහිප දෙනෙකු බිහි උනොත්, අර ......  පළමුවෙන් බිහි වෙච්ච නායකයට මොකද්ද වෙන්නේ ....? දේශය තුල වූ ඒකීය භාවයට මොකද වෙන්නේ ...? දෙවියන් වහන්සේ ඒකට දෙන උත්තරේ මොකක් වෙයිද .....?
අතීතයේ මිනිස්සු අහිංසකයි..... ලැබුන දෙයක් බාර ගත්ත උතුම් වූ කොටසක්..... සරල සමාජය තුල ගැටුමක් හෝ අන් අය අභිබවා යමක් දක්නට ලැබුනේ නෑ. දෙවියන් තමයි මේ උත්තරීතර දේශය සාමකාමිව පාලනය කලේ. මේක වෙන්න ඇති දෙවියන්ගේ යහ පාලනය 
මෙකි දෙවියන්ගේ අඩවිය තුල එක් රැයකින් බිහි වූ ප්‍රාදේශීය දෙවිවරු..... ගංභාර  දෙවිවරු කිහිප දෙනෙක් ,මහ බ්‍රහ්මයාගේ අණ නොතකා ක්‍රියා කරද්දී .... අපා ගත උණු හැටි ......  ආයෙත් නම් මේ දෙවිවරු දේව මණ්ඩලයට ගන්නේ නැතිළු. 
දෙවිවරු යයි කියා ගත්ත උන්ගේ  බලය ක්ෂය වෙද්දී , ප්‍රවිෂ්ඨ වන යක්ෂාවේශය ..... නැවතත් මේ පුජනිය වූ භුමිය තුල කරක් ගහද්දි, අනේ ආයෙත් ගද ගහන්න පටන් අරන්. ගැත්තන්ට නම් දෙවියන්ගේම පිට තමා . 
දෙවියන්, යක්ෂයින්  කවුරුන්දැයි ...... මේ වන විට හදුනා ගත නොහැකි තත්වයට පත්ව ඇත්තේ. සියළු දෙනාම  සුදු වතින්  සැරසී සැරිසරන නිසාවෙනි. 
මෙවැනි වෙස් ගෙන සසරේ සැරිසරන දනන් .... පිං රැස් කිරීමට යයි සිතා මේ දිනවල කරන මහා පුණ්‍ය කර්මය මොකද්ද කියල මං අහන්න කැමතියි දෙවියන්ගෙන්..... 
පෙරදා ඇති වෙන්න මතක බන කියල  .... මේ වන විට පාංශුකුලයත් දීල අවසන් කරපු ,  ඒ කුණු වෙච්ච මලකුනට ආයෙත් කවුද මේ පන දෙන්න හදන්නේ ? නැතිනම් කුම්භාන්ඩයෙක් වෙලා තාමත් මේ සසර දනව්වේ සැරි සරනවද ඒ භූත ආත්මය ......  මගේ දෙවියනේ .....? 
දේශයක් පාලනය කරන්න ....... එකම අනක්  යට දෙවියෙක් එනකන් අපි බලන් ඉන්නවා, දෙවියනේ. 
මිට පස්සේ ..... අපි පිහිට පතන්නේ ...... දුක් ගැනවිලි කියන්නේ ..... ඒවා ඉටු කර ගන්න පුජා වට්ටි තියන්නේ මොන දෙවියටද .....? දෙවියනේ ...... 





Saturday, July 11, 2015

සඳ ..... නුඹ මට හිමි නෑ.....


නුඹ සඳක් ...... බැස යන......
සීතල හෝරාවට මගේ හිත කිති කවන.....

ගං දෑලේ.... නුරාවට රටා මවමින්.....
බට පඳුරු අස්සෙන් විනිවිදව  .....
සීරුවට එතෙන  ..... කෝල නුඹේ  රැස් .....

මං හිතුව  ......  නුඹ .... අයිති මට .... තමයි .......

සුමුදු ලතාවක ..... පිපුන මන්දස්මිතය ....
පුබුදු කල ...... නුඹ මුදු තොළඟ ......
හාදු දුන් ..... උවනතට ..... සිත කැළඹු ..... නුරාවේන් 
සත්තමයි ...... නුඹ මට දුන්නු පැතුම් පොදී ......

නුඹ සඳක්....... 
මට කෝම අයිති වෙන්නද ....?
මතක නැති උනා......
රැදෙන්න බැරි බව .....

සඳ .... නුඹ මට අයිති නෑ.......




Wednesday, July 1, 2015

අනන්තය .....


මගේ ඇස් දෙස බලාන , ඔබ මට බොහෝ දේ කිව්වා. ඒ තුල වූ විස්වාශය අපිරිමිතයි කියල මා දුටුවා. මේක තමා සත්‍ය ප්‍රේමයේ නියම ඇත්ත .......

දින , සති , මාස ගණන් ගෙවෙන කොට ,........ ඔබ කියූ ....... බොහෝ දේ ...... හොයන්න ..... මට අනන්තයට යන්න උනා...... යන්න මං පාර දන්නෙත් නෑ. ......

කවුරුත් එන් නැති....... 
කවුරුත් යන් නැති.....
මල් පෙති විසුරුණු මල්පාරේ.....
දිනයක හමුවෙමු ........ 
හමු වී හිනැහෙමු ..... 
හිනැහී ......වැලපෙමු .......
අපි ආයේ ....

මට මතක් උනේ ගුණදාස කපුගේ කියපු මේ සින්දුව ..... මතක විදියට ලියවුනා...... හරිද මන්දා....... 

අනන්තයට යන්න පාර හොයා ගන්න බැරි උනු  මට  ..... ආපහු යන්න පාර කියන්නේ කවුද  ...? 

ඔබ දන්නවද ...... අනන්තයට යන පාර ......?

Sunday, June 28, 2015

සයිබර් අන්දරය



ඔබ සිහිනයක් ..... 
සයිබර් අවකාශේ පාවෙලා ආව .... 
සැහැල්ලු  උවමක් වගේ ......
නොනිත්..... ඇල්මක ..... උඩ බලන් ඉන්දවපු...
නුලකින් ගැට ගහපු ...... රතු පාට බැලුමක් වගේ.....

කොයි වෙලේ ඉගිලිලා යාද ..... නොදනිත්....

සුන්දර ඉසව් සොයනු රිසියෙන්.......

සයිබර් ප්‍රේමය....... මං දැකපු හීනය ....

තිරයට එහා ගිය... හීනියට පෙරුම් පුරපු 
පාට පාට ....සබන් බෝල උඩ ඇරල   
සතුටුව හිත හදා ගත්.... උන්මන්ත ප්‍රේමය 

ඔබ තවමත් හීනයක්......... 

අදහන්න බැරි හීනයක්.........
සයිබර් ඉමේ එහාට මෙහාට පාවුනු හීනයක්....

එන්නෙත් නැති..... යන්නෙත් නැති.....
ආපසු ගොසින් එන්නත් බැරි......
ආවත් ... ලං වෙන්නත් බැරි..... 
නාවත්.....දුකකුත් නැති.....

මගේ ..... හීනය .... ඔබම පමණි.....

ඒ ඔබම පමණි.......




Saturday, June 20, 2015

සොදුර ......


සොදුර ..... නුඹ ලග නැති මට දැනෙන දුක  ........
කටු අග රැදුන ....... තුඩු'ගිස්සක් 
ඇනුන විටක මෙන් ........ රිදුම් දෙන  
 හදවතේ උණුසුම්ම තැනින් වැක්කෙරෙන 
වෙඩරු මෙන් දියාරු ..... උකටලී වූ ප්‍රේමය 
සිත් මඩලේ කැලතී ..... කැලතී .......
පින් බිමක් දකිනු  රිසියෙන් මෙන් .....
 දික් වූ බෙලි ඇතිව ....
ඇදවූ ...... මුවග'ට ..... රිසි නොවූ සිනාවන්.....
කළු වූ මුහුණු ඇතිව ...... ගිලුණු දෑස'ගින්  
වැටෙන  කදුළු බිඳු ..... ගිනියම්ව දැනෙන කල 
නුඹම පමණි ....... මා තවම දකින්නේ......
අද ..... ? හෙට ...... ? එනු එතැයි .....
මං ...... තවමත් බලන් ඉන්නවා......
තප්පරෙන් ..... තප්පරේ ...... 
හිත් කොනින් එබෙන විට .....
කල්පෙකින් නොදැක්ක ..... නුඹ 
එනු ඇතැයි ........ 
මං ආයෙත්ම සිතනවා........    

Thursday, May 28, 2015

අඟුණුකොළපැලැස්ස ප්‍රජා විශෝධන කාර්යාලයේ ඵක් සමාජ සත්කාරයක්



           ශ්‍රී ලංකාවේ විවිධ සුළු වැරදි සඳහා අධිකරණය ඉදිරියේ චෝදනා ලබන වරදකරුවන් විශෝධනය කිරීම සඳහා පිහිටුවා ඇති ප්‍රජා පාදක විශෝධන දෙපාර්තුමේන්තුවේ කාර්ය භාරය. දිවයින පුරා පිහිටි සියලු අධිරකණ බල ප්‍රදේශ මුල්කර ගෙන මේ වන විට සාර්ථකව ක්‍රියාත්මක වෙමින් පවතී.

             මෙම සුළු වරදකරුවන් විශෝධනය කිරීම සඳහා විවිධ වැඩසහන් ක්‍රියාත්මක වන අතර. එහි එක් වැඩසටහනක් ලෙස මෙම භාවනාමය වැඩසටහන අඟුණුකොළපැලැස්ස මහේස්ත්‍රාත් අධිකරණයේ ප්‍රජා විශෝධන ආඥාලාභින් සඳහා 2015.05.26 දින අගුනුකොලපැලැස්ස. අලුත්වැව පුරාණ රජමහා විහාරස්ථානයේ දී පැවැත්විණි.

           මහේස්ත්‍රාත්තුමාගේ උපදෙස් පරිදි අඟුණුකොළපැලැස්ස ප්‍රජා විශෝධන කාර්යාලය විසින් සංවිධානය කරන ලද මෙම වැඩසටහන. අඟුණුකොළපැලැස්ස ප්‍රජා විශෝධන නිලධාරි ආර්.එන්.රාජපක්ෂ මහතාගේ මුලිකත්වයෙන් සංවිධානය කරන ලදි.

  වලස්මුල්ල හා තංගල්ල ප්‍රජා විශෝධන නිලධාරි අනුර රෝහණ මහතා, හම්බන්තොට ප්‍රජා විශෝධන නිලධාරිනි ශෂිකලා දුලාෂිනි මෙනවිය. අඟුණුකොළපැලැස්ස ප්‍රජා විශෝධන කාර්යාලයේ වැඩ පරික්ෂක කේ.එස්. සමන්න කුමාර යන මහත්ම මහත්මීන් ඇතුළු අධිකරණ කාර්ය මණ්ඞලයේ නිලධාරින් පිරිසක් ද සහභාගි විය. 

 
      අලුත්වැව පුරාණ රජමහා විහාරස්ථානාධිපති ස්වාමින් වහන්සේගේ අනුශාසනා ඇතුළුව. අඟුණුකොළපැලැස්ස මහේස්ත්‍රාත් අධිකරණයේ රෙජිස්ට්‍රාර් මහතා ඇතුළු එම කාර්ය මණ්ඩලයේ  මහත්ම මහත්මීන්ගේ සහයෝගයෙන් වැඞසටහන සාර්ථක කර ගත් අතර.  ප්‍රදේශයේ රාජ්‍ය ආයතන කිහිපයක් ද මිට දායකත්වය දක්වන ලදි.

වරදින් මිදුනු යහපත් පුරවැසියෙක් බිහි කිරීම ප්‍රජා විශෝධන දෙපාර්තුමේන්තුවේ දැක්ම වන අතර . මෙම වැඞසටහන ඵ් සදහා ඵක් සමාජ සත්කාරයකි.

 

Sunday, May 10, 2015

ඇය පියවතී ..... නම් වුවාය.


ඕ සුසුම් ලන්නීය. හිස් බැල්මෙන් වරෙක තැවෙන්නීය..... ජිවත් වන්නන් වාලේ , ඇය ජිවත් වනවා යයි..... බැලු බැල්මට වටහා ගත හැක.

දන්න කාලේ ඉදන් ඔයා මනුස්සයා ඔහොම තමයි......... කවුදෝ කියනවා දවසක් මට ඇහුනා ....... 

හිර ගෙදර බස් එකට ඇය නැංගාය.......  තවමත් බලා හිදින්නිය........ කවුරු එනකන්ද....? කවුරු ආවත් නාවත් , ඇයට කම් නැත. ඇය ඇයගේ ලෝකයේ. 

වරෙක ඇය උණවටුනට රැගෙන ආවාය...... වැඩි දුර පරීක්ෂණ සදහා අංගොඩ නතර වෙන්නටද  සිදු වුවාය. අන්තිමට එහිම නේවාසික විය. 
ඇයට උරුම හිර ගෙදර නොව, අංගොඩ රෝහලයි. වරද ඇගේ නොව..... අප නොදන්නා බලවෙගයකින් ඇයව මෙහෙය වීමයි.
  
මාස හයක පමණ ප්‍රතිකාර වලින් පසු ඇය නැවතත් හිර ගෙදරටම ආවාය. 

මේ ඇගේ කතාවයි...... ඇය පියවතී ..... නම් වුවාය. 

පියවතී සිව් දරු  මවකි. වැඩි කතා බහක් නැති පාඩුවේ ජිවත් වන්නියකි. ඇගෙන් කාටවත් කරදරයක් නැත. එහෙත් වටපිටාවේ ඉන්න නෑදෑයින්ට නම් ඇගේ පවුලම කරදරයකි. හේතුව, ඇය ජිවත් වූ ඉඩම් කොටස අයිති කර ගන්නට ඔවුන් මාන බැලු නිසාය. 

ඒ පැත්තේ අය නම් කිව්වේ, පියවතිට මොනවදෝ දීලා කියල. ටිකක් ඔළුව හොද නැති ගතියක්ද කොහෙද තියනවලු. 

මනුස්සයා හැමදාම මුහුදු ගියා, මාළු  විකුණලා කියක් හරි ගෙනවිත් තමයි මේ පවුල රැක්කේ. ළමයින්ගේ කරදඩු උස් උනේ නිකන්මයි. ඉස්කෝලේ ගියත්, එච්චර දස්සකමක් තිබුනෙ නෑ. අන්තිමට ලොකු කොල්ලෝ දෙන්නත් මුහුදු රස්සාවටම ගියා. කෙල්ලෝ දෙන්න ගෙදර හිටිය. 

ගෙදර වැඩපල කරන්, පියවතී කාලය ගෙව්වා. ඇයට වෙන ලෝකයක් නැත. යාළු, මිතුරු ඇසුර  ..... ඒ දේවල් ඇය කවදාවත් අත් විද නැත.සමීප සබදකම්...... හැගීම්..... බැදීම්...... ඒ කිසිත් ඈ නොදත්තාය. 

කල වයස ආවම කසාද බැද , ළමයි හැදුවද....... ඉබේ හැදුනාද කියලවත්...... ඇය දන්නවද දන්නේ නැත. 
ඇගේ පටු ලෝකයේ ......  ජීවිතය ඇතුලාන්තයටම හැරවූ නෙත් ඇතිව ඇය සිටින්නීය.

පියවි ලෝකයට ඔබ්බෙන් ඇගේ ලෝකය තනන්නට ඇති බව , කල් ක්‍රියාවෙන් නම් විද්‍යමාන වේ. 

පියවතී .... දිනක් නිදා හුන් තැනින් නැගිට්ටාය. ඇගේ ලග පැදුරේ ඇලවී උන්...... ඇගේ නැන්දම්මා හා නෑනා දෙස වරක් පමණක් බලා, දනී පනී ගා නැගිට ..... විත් , මන්නා පිහිය අතට ගත්තාය. 

නිදා සිටි අම්මයි, දුවයි...... දෙතුන් පාරට පෙති ගැසුවේ, මාළු කපන්නා සේය. හේතු කිසිවක් නොදත්..... නිදා සිටියවුන් ..... නැවතත් අවසන් නින්දටම පිලිපන්නාහ. 

නැවතත් ඇය හිස් බැළුම් හෙලන්නිය. වට පිටාවේ මිනිස්සු පිරි ඇත. ..... කසු කුසු ගාමින් සිදු වූ විපත්තිය..... ගැන ඔවුන් කතා කරති.

පොලිස් ජීප් රියෙන්  පැමිණි රාළහාමි කෙනෙක් , පියවතිට කතා කළේය. පියවතිගෙන් කිසිවක් නොවිසාම, මන්න පිහියත් සමග ජීප් රියට නංවාගෙන ඔවුහු  පිටත්ව ගියහ.

සිද්දිය පිළිබද පොලිසිය දිගින් දිගටම ඇගෙන් ප්‍රශ්න කරන ලදී. ඇය මොනවා කියන්නද...... කියන්න කිසිත් නොදත්තාය. 

කාන්තාවන් දෙදෙනකු ඝාතනය කිරීමේ වරදට ඇය හිර ගෙදර ගියාය. 
ඇයට ගෙදරත්..... හිර ගෙදරත් අතර වෙනසක් දැනෙන්නේ නැත. ඇය..... තවමත්..... බලා හිදින්නිය. 

ඒ කවුරුවත් ඇයව බලන්න එනකන් නම් නොවේ...... කිසිවකු ..... ඇය බලන්න ආවේද නැත. ගෙදර අයට ඇයව පෙනුනේ මිනීමරු ගෑණියක ලෙසෙනි. 
ඔහොම ... සති දෙකින් දෙකට හිර ගෙදරත්.... උසාවියත් අතර ඇය සංචාරය කලාය. ඇය වෙනුවෙන් කිසිවෙකුත් නැත. 

පියවතී හා සිද්දිය සම්බන්ධ ..... වටපිටාව දැන සිටි එක් පොලිස් නිලධාරියකු .... උසාවියෙන් ඉල්ලීමක් කළේය. 

ඒ ..... ඇය පිළිබද මානසික වෛද්‍ය වාර්තාවක් කැදවන  ලෙසයි. 

උසාවියෙන් අවසර ලැබිණ. මුලින් උණවටුන වෙතත්, වැඩි දුර ප්‍රතිකාර සදහා අංගොඩ මානසික සෞඛ්‍ය ආයතනය වෙතත් ඇයව බන්ධනාගාරය මගින් යොමු කරන ලදී. 

සැබවින්ම, ඇය මානසික  රෝගයකින් පෙළුණු තැනැත්තියක් බව තහවුරු වන්නට විය. ඇයට වැලදී ඇත්තේ, පරම්පරාවෙන් එන නිලින ලක්ෂණ ඇති මානසික රෝගයකි. 

එහෙත්.... ඇයට රෝගයක් ඇති බව ගෙදර කිසි කෙනෙකු නොදත්හ. එවැනි යමක් තේරුම් ගත හැකි වටපිටාවක් ඇයගේ සමාජයේ සිටිය උන්ට නොතිබිණි. 

පසුව ..... පොලිසිය මගින්, ගෙදර අයව ගෙන්නා ඇගේ , ඉතිහාසය ..... පිළිබද අධ්‍යනය  කර සම්පුර්ණ වාර්තාවක් වෛද්‍යවරයා මගින් උසාවිය වෙත ලබා දෙන ලදී .  

පියවතිට ..... ප්‍රතිකාර වලින් පසුව පියවි සිහිය ලැබුණි. තමන් අතින් සිදු වූ සිද්දිය ගැන දැනෙන්න පටන් ගෙන තිබුණි. සිය නැන්දම්මා හා නෑනා මැරුවේ තමන් බව මතක් වන්නට විය. එහෙත්...... ඒ වන විට සියල්ල සිදු වී හමාරය. 
සියල්ල තේරුම් බේරුම් ගියාට පසුව දරුවෝ ඇයව බලන්නට හිර ගෙදරට පැමිණියහ.  

දිනෙක, ඇය පිච්චෙනවා යයි කෑ ගසමින් , හිර ගෙදර තුල  කළහ කරන්නට පටන් ගත්තාය. පියවි සිහිය පැමිණියද ...... ඇය නැවතත් රෝගී වන්නට විය. 

පියවි සිහිය නොලැබුණා නම් හොද යයි, ඇයට දැන් නම් සිතෙන්නට ඇත. ඇය සත්‍යට බිය විය. 

 නඩුවෙන් ඇයට සහනයක් ලැබුණි. සිතා මතා නොකළ මිනි මැරුමක් බව තහවුරු වන්නට විය. ඇයට ඇප ලැබුණි. දරුවෝ  ඇයව ගෙදර ගෙන යන්නට බිය වුහ. ලෝකයා මොනවා නොකියාද යන මිත්‍යාවට නතු වෙමින්, ඇයට  සිය මහ ගෙදර වෙත යන්නට සිදු විය......

මින් එක දෙයක් අප තේරුම් ගත යුතුයි .... මොකද්ද ඒ...... 

අප අතර සිටින අමුතු හැසිරීම් ඇති අයවලුන් පිළිබද සැළකිලිමත් වීම, අනතුරු අඩු කර ගැනීමට හේතු වන බවයි. 


එක් සත්‍ය සිදුවීමක් ඇසුරිනි


Sunday, May 3, 2015

කදුළු විතරද මන්දා.....



මං අද ..... කොටු පවුරෙන් වටවුනු  හුදෙකලා කුටියක, දුක් විදින්නේ සුසුම්ලන්නේ ..... කාගේ වරදින්ද කියල  හිතා ගන්න බැ. 
මං වැරදිද.......? ඇත්තටම මං වැරදිද ......? ලෝකෙම මගේ දිහාට ඇගිල්ල දික් කරලා කිව්වේ මොනවද .........
උඹ....... හොර මිනිහ එක්ක එකතු වෙලා මිනිහ මරා ගත්ත ගෑනි කියල නේද..... 
ඔව්....... මං මිනිහ මරා ගත්ත ගෑනි තමයි........ මං හිරේ ගියේ ඒකට..... මේ ලෝකේ විදින්න ඕන අවනම්ඹු  වින්දා ....... කුණු කතා හැම එකක්ම මං ඇහුව....... තව මොනවද....... මට අහන්න ඉතිරි වෙලා තියෙන්නේ. 
ලැජ්ජාව....... බය කියන එක ...... මට දැන් දැනෙන්නේ නෑ.
පාතාල ලෝකේ ...... run කරන කුඩු ගෑනුන්ගෙයි , මගෙයි අතර මොකද්ද දැන් තියන වෙනස...... මං  නිදා ගන්නෙත් උන්ගේ  කබල් පැදුරෙ කොනක. කන්නේ ...... උන්ට දෙන බත් පතමයි. උනුයි...... මායි සමාන  වෙන්නේ ඔන්න ඔතනදි. අපි ඔක්කොම වැරදි කරපු ගෑනු  ....... 

මට දුක මගේ දුව ගැන ...... කෙල්ල කොන්වට් ඒකට වෙලා දැන් මොනවා කරනවා ඇත්ද......?
මමී...... පපාව මැරුවේ ඇයි කියල ..... කෙල්ල මගෙන් ඇහුවේ නෑ. සහන්ගේ අම්ම මට ඔක්කොම ඉස්සරහ කිව්වේ මිනීමරු ගෑනි කියල.....  දුව බයවෙලා බලන් හිටියට , ආච්චි ලගට ගියේ නෑ. 
මමී...... මමී..... කිය කියා ...... මට තුරුල් වුණා. දුට මේව නොතේරෙනවා කියල හිතන්නත් බැ. සහන්  මට ගහද්දි..... දු පැටියා විතරයි...... මං අඩන හැටි දැක්කේ......
පපා .....  මමිට ගහන්න එපා කියල කෑ ගැහුවත්...... සහන් නෙමෙයි කෙල්ල දිහා ඇහැක් ඇරල බැලුවේ. තිරිසනෙක් වගෙයි වෙලාවකට හැසිරුනේ. 
දුට හිටියේ මං විතරයි. ඒකයි මට දුක....

මට මගේ කෙල්ල දකින්න වෙන්නෙත් , මාසෙකට සැරයයි. 

ඒ මුසල දවසේ කෙල්ල මගෙන් ඈත් කරේ, නීතියට යටත්වයි. සහන්ගේ මරණය පිළිබද තිබුන එකම සාක්ෂිය , මගේ දුව. මට දු ගෙන් ඈත් වෙන්න සිද්ධ උනත්, මාසයකට සැරයක් වත් දකින්න , මට උසාවි නියෝගයක්  ගන්න උනා.  සිස්ටර් මාසෙකට සැරයක් කෙල්ලව මං ගාවට එක්ක එනවා. 

සති දෙකෙන් දෙකට මං උසාවි ගියා. හිර ගෙදර බස් එකේ , තල්ලු වේවි, දාඩිය මුගුරු දාගෙන , නම කතා කරනකන් උසාවි කුඩුවට වෙලා හිටිය. අනිත් කුඩුවෙන් රගුනාදන් විත්ති කුඩුවට ගොඩ වෙද්දී,  මාත් ඒ පස්සෙන් හිට ගත්ත. කුඩුවට නගිනවා, බහිනවා........., මාස ගානක් යනකන් ඔය විදියට අපට ඇපවත් ලැබුනේ නෑ. 
රගුනාදන් මං දිහා දැන් බලන්නේ පුදුමාකාර තරහකින්. නාදුනන දෙදෙනෙක් වගෙයි, අපි උසාවියේදී හම්බ උනේ. 
මට ආරංචි උනා, රගුනාදන් පොලිසියට කියල තියෙන්නේ මං සහන්ව රගුනාදන් ලව්ව  මැරෙව්ව කියල. දෙවියන් වහන්සේ විතරයි දන්නේ  මං නිර්දෝෂයි කියල 
මගේ පව් ..... මටමයි ගෙවන්න වෙන්නේ. මට ඉන්නේ අම්මයි, තාත්තයි විතරයි. ඒ ගොල්ලන් අකමැත්තෙන් මං සහන්ව බැන්දේ . ඒ පව තමයි මම  අද ගෙවන්නේ. ඒ ගොල්ලන් උසාවි එන්නෙත් නෑ. මාව බලන්න හිර ගෙදරට එන්නෙත් නෑ............  ලැජ්ජාවට 

මට මතකයි සහන්ව මුලින් හමු වෙච්ච හැටි....... 

good morning sir......
good morning , take a sit.......

'අරලියා' ගාමන්ට් එකේ සෙකට්‍රි පෝස්ට් එකට මං ඔහොමයි ආවේ. සහන් තමයි මගේ බොස් . 'අරලියා' ගාමන්ට් එකේ අයිතිකාරයා, මගේ සැමියා වෙයි කියල , එදා මට නිකමටවත් හිතුනේ නෑ. 
නොගැලපෙන විවාහයකට සියළු බාධක මැද මං එකග වුනේ, හරියට රටක් රාජ්‍යක් ලැබුන රැජිනක් වගේ. 

මොකද්ද ..... මගෙයි, සහන්ගෙයි නොගැලපීම ....... සහන් මට වඩා අවුරුදු විසිදෙකක් වයස වැඩි කෙනෙක්. අපේ වයස් පරතරය නොගැලපීම් ගොඩකට මග පෙන්වන්නක් බව , එදා මට තේරුනේ නෑ.  

මගේ ලස්සනට....., ලාබාල කමට තමයි .... සහන්ගේ හිත ගියේ. ඒත් ඒ දේවල් තාවකාලිකයි කියල , එදා අපි දෙන්නටම හිතුනේ නෑ. 

බැදලා අවුරුදු එකහමාරක් විතර යනකොට මගේ දු පැටියා අපි අතරට ආව. මගේ ලෝකයම උනේ මේ කෙල්ල. 

සහන් මට ඕන තරම් සල්ලි දුන්නා. මට කිසි කරදරයක් ගෙදර තිබුනේ නෑ. ඒත්...... මං ආසයි ලස්සනට ඉන්න. කෙල්ල ලැබිල හිටියත්, මං තවත් ලස්සනට පේන්න පටන් ගත්ත. මගේ මේ පිළිවෙල සහන්ට  රුස්සන්නේ නැතිව ගියා. එයාට මාව සැකයි. හැමදාම දවස පටන් ගත්තේ ප්‍රශ්නයකින්, බහින් බස් වෙලා. 

ඉවසල බැරිම තැන, සහන් මට බනින කොට , මාත් එකට එක කියන්න පටන් ගත්ත. මට සහන්, එන්න එන්නම එපා උනා. එයාටත් , මාව පෙනුනේ වහ කදුරු වගේ. සහන් මට එක එක මිනිස්සු පාවල බනින්න පටන් ගත්ත. 
අම්මලගේ හිත රිදවපු පාපයට වෙන්න ඇති. මට මෙහෙම උනේ. කවුරුත් මේ ප්‍රශ්න වලට මැදිහත් උනේ නැත්තෙත් ඒකයි  . මගේ ලග හිටියේ දුව  විතරයි. මං වෙලාවකට දුව තුරුළු කරන් ඇඩුව. 

මමී....... අඩන්න  එපා මමී....... තාත්තා ,,,,,, නෝටි...... 


මම තාත්තා ගැන දුට කොහොම තේරුම් කරන්නද.....? අපිට පවුලක් විදියට කවදාවත් එකතු වෙලා ඉන්න බෑ ...... මගේ දුව. 

ඔය විදියට මං මගේ කසාදය තුල හුදෙකලා වුනේ නිකන්මයි. කතා බහ කරන්න කෙනෙක් නැහැ. එලියට බහින්න විදියක් නෑ. ඔක්කොම මට තහනම්.
ඔය අතරේ අල්ලපු ගෙදර පදිංචියට , කුලියට ගේ අරන්, රට ඉදල ආපු කෙනෙක් ආව. එයා තමයි රගුනාදන් ..... තලෙළු පැහැයෙන් යුත් ඔහු කඩවසම් තරුණයෙක්. ද්‍රවිඩ ජාතිකයෙක්.
දවසක් , මිදුලේ ඉන්දෙද්දී මාත් එක්ක හිනා උනා. කල්ප කාලෙකින් දැක්ක මනුස්සය වගේ මාත් හිනා උනා. ඔහොම ලාවට පටන් ගත්ත ඇයි හොදැයිය ...... සහන් ගෙදර නැති වෙලාවට අපේ ගෙදර එන්න තරම් දුර ගියා. කොහොමත්, සහන් ගෙදර එන්නේ හැමදාම රෑ වෙලා. 

කාලයත් එක්ක, මං රගුනාදන්ට ගොඩක් ලං වුණා. දුත්  , රගු අන්කල් කියල .... රගුනාදන් එක්ක ඉක්මනටම යාළු උනා.

මං හැමදාම බලන් හිටියේ රගුනාදන්ගේ ආශ්‍රයේ කාලය ගෙවන්න. 

රගු කිව්වා,


 අපි බදිමු...... නැත්නම් පැනල යමු......කියල. 
මං කිව්වා ....... දු , දාල මං කොහොමද යන්නේ . ......

රගු දවසක්, කියපු කතාවට  මගේ ඇස් දෙක උඩ  ඉන්දුන ,  ඒක අහල. 

අපි සහන්ව මරමු..... ඔයාට එයාගෙන් කරදරයිනේ. අනික, සහන්ගෙන් දික්කසාද වෙන්නේ නැතිව මට ඔයාව බදින්නත් බැනේ. .....

සහන්ට මං ද්‍රෝහී උනාට ,  එයාව මරන්න තරම් හිතක් මට තිබුනේ නෑ. 

රගු කියපු ඒ කතාව මං එච්චර ගණන් ගත්තේ නෑ. මං හිතුවේ, මං ගැන අනුකම්පාවෙන් රගු ආදරේට කියපු කතාවක් කියල. 

එදා හොදටම කරුවල දවසක්....... වැස්සත් ටිකක් තදේට තිබුන. දොරවල්, ජනෙල්  එකට එක වදින්න ගත්තා. මං දුවත් තුරුළු කරන්, නිදා ගෙනයි හිටියේ. සහන් ආවද  කියලවත් මං දන්නේ නෑ. වෙනදාටත් මං හොයන්නේ නෑ. අපි නිදා ගන්නෙත් කාමර දෙකක. 

එක පාරටම පල්ලෙහා මර ලතෝනි දෙන සද්දයක් ඇහුනා. මොකක් උනත්, ඒ විලාපෙට මං පල්ලෙහාට දිව්වේ එක පිම්මට, 

සිද්ද වෙච්ච දේ මටම අදහ ගන්න බැරි උනා. පිහියක් අතින් අරන් රගු ඉන්නවා , සාලේ මැද්දේ. මං රගු ලගට දිව්වා...... මොකද උනේ බලන්න. 
සහන්....... සහන්........ ලේ පෙරාගෙන කාපට් එක උඩ වැටිලා හිටියා. ඔහු හිටියේ උඩ බැලි අතට , එහෙම ඉදන් මං දිහා බැලුව. මං පහත්  වෙලා සහන් කියල කතා කරා....... අනේ එයා එක පාරටම ඇස් පියා ගත්තා. දුවත්, මගේ සද්දෙට පහලට දුවල ආව. දුව එනකොට රගු පිහියත් අරන් යන්න ගිහින්. 
පපා...... මොකද උනේ ..... මමී කියන්න මොකද උනේ කියල....... ඇයි පපා...... ලේත් එක්ක ඉන්නේ .......
අනේ පැටියෝ..... මං එනකොට පපා , වැටිලා හිටියේ. 
මට කියන්න පුළුවන් එච්චරයි....... මං කොහොමද කියන්නේ දුට , රගු අන්කල් පපාව මැරුව කියල.  
මං දන්නවා. රගු සහන් මැරුව කියල. දුට විතරක් නෙමෙයි, ඒ වෙලාවේ මං මුළු ලෝකෙන්ම හැංගුව, රගු ..... සහන්ට පිහියෙන් ඇන්න කියල.

අපේ සද්දෙට වටපිටාවේ ගෙවල් වල ඉන්න අයත් ආව. මං දු බදාගෙන ඇඩුව. සහන් මැරිලලු. 

පොලිසියෙනුත් ආව. සහන්ව සුදු රෙද්දකින් වහල අරන් ගියා. පොලිසිය මගෙන් ප්‍රශ්න කරා. සිද්දිය ගැන. මං රගු ගැන කිව්වේ නෑ. මං පහලට එනකොට සහන් වැටිලා ඉන්නවා දැක්ක කියල විතරයි මං කිව්වේ. 
සහන්ගේ මරණය ගැන ගැන දිගින් දිගටම මගෙන් ප්‍රශ්න කරා. පොලිසියට මාව සැකයි. මොකද වටපිටාවේ මිනිස්සු පොලිසියට කියල අපි නිතරම රණ්ඩු  වෙන බව. 

මං හිතුවේ නෑ. රගු ගෙයි  මගෙයි සම්බන්ධෙ අනිත් අය දන්නවා ඇති කියල. ඒත්....... අනිත් අයට ඒ ගැන ඉව වැටිලා . පොලිසිය ඒ ගැනත් මගෙන් ඇහුවා. 
එදා උදේ වෙද්දී , පොලිස් බල්ලෝ ගෙනාව, මරණයේ තව සාක්ෂි හොයා ගන්න. එකෙක් ගිහින් නතර වෙලා තියෙන්නේ , රගු ගේ ගෙදර, රගු ගෙදර ඉදල නෑ. ගේ වහලා. පොලිසියට තවත් මං ගැන සැකයි.

සහන්ගේ මිනිය පෙට්ටියක දාල ගෙදර ගෙනාව. මං සහන් ලගට වෙලා පුටුවක් තියන් දුත් එක්ක වාඩි වෙලා හිටිය. සැරින් සැරේට ඇඩුව. එයාගේ නෑදැයෝ, යාළුවො හැමෝම සහන්ව බලන්න ආව. සහන්ගේ අම්ම, ඊයේ ඉදන්ම අපේ ගෙදර . 
පොලිසිය රගුව හොයාගෙන පොලිසියට අරන් ගිහින් කියල කවුදෝ කියනවා මට ඇහුනා. මං ගැස්සුනා ඒ ආරංචියත් එක්ක. 

මගේ පුතා මරා ගත්ත මිනීමරු ගෑණි...... උඹත් මැරියන්...... පලයන් පුතා ගිය තැනටම. කියා කියා ...... එක පාරටම සහන්ගේ අම්ම කෑ ගහන්න පටන් ගත්ත. මල ගෙදරට ආව හැමෝම පෙට්ටිය ලග පිරෙන්න ගත්ත. මං තවත් හයියෙන් කෑ ගහල ඇඩුව. 

හවස් වෙද්දී පොලිසියෙන් ආයෙත් ආව,.........මං දන්නවා  මාව එක්කන් යන්න තමයි එන්නේ කියල ...... හැමෝගෙම ඇස් බැළුම් මැද , මං ගිහින් ජීප් එකෙන් වාඩි උනා. දු පැටිය කෑ ගහල ඇඩුව. මමී..... යන්න එපා කියල .දු අඩද්දී, මං මගේ ඉරණම් ගමන ගියා. 


රගු ..... පොලිස් කුඩුවේ ඉදන් , මං දිහා රවාගෙන ඉන්නවා මං දැක්ක. එයා හිතන් ඉදල තියෙන්නේ මං තමයි, රගුව අල්ලලා දුන්නේ කියල, ඒකයි, මට විරුද්ධව සාක්ෂි දීල මාවත් පොලිසියට ගෙන්න ගත්තේ. මං කවදාවත්, මේ අපරාධයට අනුබල දුන්නේ නෑ. දෙවියන් වහන්සෙයි..... මමයි විතරයි ඇත්ත දන්නේ. 

රගුගෙයි, මගෙයි අනියම් සම්බන්ධය දිගටම ගෙනියන්න ඕන නිසා, මං රගු ලවා සහන්ව මැරූ බව තමයි මුළු ලෝකයටම ඇත්ත වුනේ. 

මනුෂ්‍ය ඝාතනයක් සිදු කිරීම, ඊට අනුබල දීම හා කුමන්ත්‍රණය කිරීම යටතේ , මට නඩු පැවරුණා. 

ඉතින්, මං නොකළ වරදකට හිරේට එන්න සිදු වුනේ දෙවියන් වහන්සේගේ කැමැත්ත නිසා වෙන්න ඇති. මං වරදක් කලා.

 ඒ ...... සහන්ට ද්‍රෝහී වීම, ඒකට ලැබුන දඩුවම තමයි මේ.

මං අම්මලගේ හිත් රිද්දුව, නොගැලපෙන කසාදයක් කරගෙන. 
ඇයි මං වැරදි කලේ. දෙවියන් වහන්සේ ඉදිරියේ ...... මං හැම දෙයක්ම පාපොච්ච්ච්රණය කරනවා. 

අම්මයි, තාත්තයි වයසයි...... ඒ දෙන්නම ලෙඩ ගානේ හිටියේ. මං පවුලේ එකම ළමයා. අපිට ගොඩක් සල්ලි තිබුනේ නැ. අපි අමාරුවෙන් ජිවත් වුනේ. ඒකයි මං රස්සාවකට ගියේ. සහන්ට සල්ලි තිබුන නිසා මං සහන්ව බැන්දා. මට හැම සම්පතක්ම ලැබුන. 

ඒත්....... මට ඕන ආදරේ සහන්ගෙන් ලැබුනේ නැ. ...... එයා මාව තේරුම් ගත්තේ නෑ...... දුටයි. මටයි..... හොදින් සැලකුවේ නෑ. 

මං රගු එක්ක සම්බන්ධකමක් ඇති කර ගන්න හේතු උනේ ඒක. මං නරක ගෑනියෙක් නෙමෙයි...... මට ඕන වුනේ ආදරය........ රගු මට ආදරය දුන්නා. 

මං දන්නවා දැන්......ඒකත්....... බොරු ආදරයක්  බව. එයා සහන්ව මැරුවේ, ඇයි කියල මට දැන් තේරෙනවා. සහන්ව මැරුවම මාව බදින්න ලේසියි. ඊට පස්සේ, සහන්ගේ බුදලේ ගන්න ලේසියි. ඒකයි, රගුගේ plan එක. 


මං දන්නේ නැති උනාට අනිත් ඔක්කොම දැනන් ඉදල තියනවා, රගුගෙයි, මගෙයි සම්බන්ධෙ. අපි කරන සමහර දේවල් අපිටම පේන්නේ නෑ. ඒත්.... ලෝකය අන්ධ නෑ. 

එක ප්‍රශ්නෙකට උත්තර හොයන්න , මං තෝරාගෙන තියෙන්නේ, කවදාවත් උත්තර නැති ප්‍රශ්නයක්. ප්‍රශ්නෙට ප්‍රශ්නෙකින් උත්තර හොයන්න බෑ කියල මං දැන් දන්නවා. 

ආදරය, රාගය තාවකාලිකයි. ඒ හැම දේකින්ම සිද්ධ වුනේ මගේ ජීවිතය විනාශ උන එක විතරයි. මං විතරක් නෙමේ මගේ දුගේත්, අපි දෙන්නටම ලෝකෙට මුණ දෙන්න බැරිව ගියා. 

කෙල්ල කොන්වට් එකේ ඉන්න එක මට සැනසීමයි. උසාවියෙන් කැමති උනා. භාරකාරත්වය තාවකාලිකව කොන්වට් එකේ සිස්ටට දෙන්න. 
මට ඇප ඉල්ලන්නවත් කෙනෙක් නැති උනා, මට උදව් කරන්නකැමති උනා. මෙහේ ඉදල එලියට බැස්ස කෙනෙක්, ඇප ගන්න ලෝයර්ස්ලට කතා කරන්න. ඒත් සල්ලි වලට, කමක් නෑ ........ කොහොම හරි මට එලියට යන්න ඕන. මගේ කෙල්ල හින්දා. ඒකිටවත් ජීවිතය දෙන්න ඕන.

නඩුවෙන් මට මොන වගේ තීන්දුවක් ලැබෙයිද කියන්න බෑ, රගු දැන් බොරු සාක්ෂි දෙන්න plan කරලා තියෙන්නේ. මට වටින් ගොඩින් ආරංචියි. කමක් නෑ. එන විදියකට ජීවිතේට මං මුහුණ දෙනව. මට දැන් හැමදේම පුරුදුයි. තව වෙන්න දෙයක් නෑ. 

ජීවිතය කුමක්ද කියා හරි හැටි නොදැන ජීවිතය වරද්දා ගත්..... සියළු දෙනාට මේ කතාව, ආදර්ශයක් වෙන්න කියලයි මං මේ කතාව ලිව්වේ, ඒත්.... නම් ගම මනංකල්පිතයි.සත්‍යට ඉතා ලගයි.